2013/2014年度財案辯論
葛珮帆議員演辭稿
2013年4月18日
主席：
有一位住喺沙田的劉先生同我講，叫梁國雄唔好拉布，回頭是岸！劉先生叫我問梁國雄，你而家拉布係為咗乜？係為香港好，定係要搞亂香港？如果香港癱瘓咗，你有乜補救方法？而家政府又無話唔傾，政府想做嘢，你又阻住唔畀政府做。好似你娶個老婆返來，你要佢包生仔，都唔係話今日娶聽日就生到仔架嘛，佢而家未生到仔啫，又唔係以後都生唔到，係唔係就咁就即刻要脅話要綁住佢，唔畀飯佢食呀？你而家拉布，口口聲聲話要爭取全民退休保障，究竟係要政府改善民生？定係要政府立即運作唔到，搞到啲公公婆婆而家就無飯食？希望梁國雄議員認真思考一下劉先生既說話。
總體回應
講番今次嘅財政預算案，對政府推出咗一籃子一次性紓困措施，亦向相關嘅大學提供新嘅資助計劃，以推動科研成果商品化，民建聯表示歡迎。但我想強調，預算案並冇回應中產階層同我哋婦女嘅訴求，對推動創新科技同新經濟發展方面力度不足，我期望政府未來可多撥資源。
資訊科技
香港嘅科研投資一向偏低，如果以GDP比例計算，只有0.7%左右，係內地嘅一半、新加坡嘅三分之一。事實上，香港必須大幅增加科研投資，先可以有效促進科技產業發展。政府嘅「投資研發現金回贈計劃」、「小型企業研究資助計劃」等，都可以推動科研，但如果想同其他先進經濟體看齊，政府一定要加大力度。特首曾經喺競選政綱中承諾五年內將政府投資研發的總開支提升至本地生產總值0.8%，業界期望佢盡快兌現承諾。
其實，綠色科技就是一個值得大力投資嘅研發領域，結合咗環保同科技，如果發展得好就可以一舉兩得。政府可以考慮設立綠色科技研發中心，加強推動依個領域嘅研發。
科研嘅下一步，就係將科研成果商品化，發揮經濟效益。目前政府有資助科研商品化嘅措施，已開始支持技術轉移、專業支援服務，同業界合作聯繫等，係好嘅開始。但任何產品要暢銷、吸唔吸引、好唔好用、易唔易用係好關鍵。香港嘅產品，從研發到商品亦缺少咗「可用性研究」依一環。依種研究就係喺設計產品嘅不同階段，持續地邀請目標受眾做試驗，收集佢哋對唔同嘅設計嘅各種身體反應同喜惡等數據，以改善產品嘅可用性、受歡迎程度同品質。依種研究喺外國好普遍，政府支持及鼓勵業界發展及使用「可用性研究」，以加強香港各種產品同服務嘅競爭力。
香港從事同創新科技相關業務嘅工商機構，當中近八成係中小企。但係唔少業界人士向我反映，依家政府進行採購同招標，往往價低者得，對科技業界嘅中小企相當不利。大型企業生產成本較低，而且財雄勢大，甚至能夠「以本傷人」，以「破底價」逼走對手，搶佔市場。
其實海外好多地方，採購時都唔會只重價錢，以澳洲為例，政府招標時除咗價錢外，仲會著重投標者嘅方案是否環保、是否有創新成分同埋是否有策略性貢獻等。政府應該參考相關經驗，採購招標時衡量多方面因素，進行生產成本分析，訂立參考價格，如果有人收取低於依個價格，政府則要仔細了解當中情況，避免業界「頂爛市」，然後將貨就價，質素冇保證，有爛尾風險之餘，亦扼殺咗中小企嘅發展機會同生存空間。我哋嘅經濟發展模式應該係「鬥好、鬥精」，而唔係「鬥平、鬥賤」。政府嘅採購政策應該與時並進，才能真正支持中小企發展。
另外，政府現時逐步喺政府場地同設施增設免費WiFi服務原意係好，但成本重，覆蓋有限，而資訊科技業界亦冇發展空間。我認為政府應該研究同通訊商合作，喺全港鋪設WiFi網絡，讓遊客同市民隨時隨地都可以上網，使香港成為一個「WiFi 城市」。
隨著科技日益普及，社會亦面對網絡保安風險，商界同政府服務亦將使用更多雲端技術。政府應該加強網絡及雲端保安，嚴打科技罪案，並且教育市民提高防範。目前學校對於點樣正確使用互聯網的教育並唔足夠，青少年喺網上缺乏保護自己的意識，不斷有青少年跌落網絡陷阱，少女被網友強姦非禮越來越多，政府不能忽視，應增加網絡巡邏人手，及加強教育及宣傳工作。
今年預算案有關科技產業的篇幅比較少，令人失望。我希望政府會「好戲在後頭」，等適當時機將各項扶助措施「成熟一項推一項」。
知識產權貿易中心
隨著國家經濟發展迅速，內地對企業發展知識產權嘅需求亦越來越大。根據中國知識產權戰略部署，到2020年中國將建設成知識產權創造、運用、保護和管理水平較高的國家。鑑於香港位處東、西方交匯處，亦背靠內地龐大的潛在市場，本身亦具備法制、專業服務同完善市場網絡等優勢，尤其是香港係亞洲區內知識產權保護體制水平最高嘅地區，有條件發展成為內地同海外相連繫嘅知識產權貿易中心。
民建聯認為，香港要發展成知識產權貿易中心，政府在策略上便應從三方面著手：一、政府要加強鼓勵本地發展創新及科技產業嘅宏觀政策；二、就係為創新科技企業提供融資同財務支援；三、培訓知識產權業中介人，建立知識產權仲裁中心嘅地位，同埋設立具規模嘅知識產權交易平台等實質推動措施。
主席，為咗鼓勵同協助本地中小企提高創新同科研嘅投資，特區政府應進一步加強對企業研發方面嘅財政補助同稅項優惠，包括考慮將現時嘅中小企融資擔保計劃嘅貸款用途，由現時提供作為營運資金，同購置同業務有關嘅設備或資產之外，擴闊至創新科研投資同知識產權方面；另外，亦應優化現時創新及科技基金旗下嘅各計劃撥款機制，放寬門檻同限制，拆牆鬆縛，以提高企業參與嘅積極性。
民建聯亦建議政府應支持本港中小企收購技術性知識產權，同埋將依啲知識產權商品化，增加資助中小企所需嘅法律費用，同埋商品化嘅初期研究、原型生產、可用性研究，同埋市場測試等成本。
旅遊發展
旅遊發展方面，依家香港嘅旅遊景點、酒店房間同商鋪供應都唔足夠，如果想吸引新嘅高增值訪港旅客客源，香港必須增加酒店房間嘅供應，同時善用本港各種天然同歷史文化資源，包括可以發展大嶼山、離島，以開拓生態同文化旅遊市場。
民建聯亦認為，為咗善用內地旅客對香港商品具有高度信心嘅商機，特區政府應該積極探討，設立專為內地訪客服務嘅港貨銷售專區嘅可行性。依個做法應該有助杜絕港貨走私活動，減低對市民日常生活嘅影響，亦可以分流只為購買港貨嘅旅客直接到「港貨專區」一站式購物，減少市區人流同交通嘅負荷量。
香港國際機場北部商業區現有約15公頃剩餘發展用地，可隨時規劃動工。政府應考慮盡快利用依塊熟地，發展集酒店、零售、餐飲、商貿、休閒娛樂嘅會展設施，開放發展海天碼頭，進一步完善北部商業區的商業環境，並且發展大型名店倉（Outlet），從而擴大北部商業區現有零售規模，形成零售業群聚效應，為前往亞洲國際博覽館參觀、參與會議、欣賞演出嘅旅客，提供更多元化嘅活動。
幼兒託管服務
今次財政預算案可以話完全忽視婦女的訴求，政府一方面話鼓勵生育，又話要釋放婦女生產力，但就得個講字，實際行動就欠奉。大家都知道，香港其實好多婦女都由於託兒服務不足，而被逼留喺屋企照顧年幼嘅仔女，白白浪費佢哋嘅生產力。政府應該善用資源，按各區需要彈性地增加尤其是6至12歲兒童嘅暫託服務名額，檢討現行嘅社區保姆託兒服務，增加社區保姆嘅津貼至合理水平，以吸引更多有經驗嘅婦女擔任社區保姆，等婦女可以安心出外工作。
加強婦女健康保障
另外，根據醫管局香港癌症統計中心嘅資料顯示，乳癌係香港女性頭號癌症，每日平均有八名女性確診患乳癌，最少一人死於乳癌；而子宮頸癌喺而家唯一有預防疫苗的癌症，但係香港嘅婦女只能到私家診所，畀成三千幾蚊注射疫苗，基層家庭根本無能力負擔。
正所謂「預防勝於治療」，主席，有乜嘢比挽救生命更重要？過去幾年，我不斷促請政府投放資源，提供免費乳癌普查、提供每三年定期免費子宮頸細胞檢查、為全港適齡女童提供免費子宮頸癌疫苗，並透過唔同的渠道，包括提升學校嘅健康教育，提高婦女嘅健康意識，請問政府究竟聽唔聽到婦女既聲音，幾時先會回應呢？
主席，本人謹此陳詞。多謝主席。